Abanyamuryango ba FPR-Inkotanyi bo mu murenge wa Kagano mu karere ka Nyamasheke barashimirwa uburyo bwiza bitwaye mu gutegura no gushyira mu bikorwa isabukuru y’imyaka 25 irangiye Umuryango wa FPR-Inkotanyi umaze uvutse.
Iri shimwe barishyikirijwe kuri iki Cyumweru, tariki ya 6/01/2013, mu nama yahuje abanyamuryango bari munzego zitandukanye z’Umuryango wa FPR Inkotanyi ku rwego rw’umurenge wa Kagano.
Intumwa z’akarere ka Nyamasheke zari zasuye umurenge wa Kagano zagaragarije abanyamuryuango ba FPR-Inkotanyi bo muri uyu murenge ko Ubunyamabanga Bukuru bwa FPR Inkotanyi bushimira abo banyamuryango uburyo bwiza bitwaye mu gutegura no gushyira mu bikorwa isabukuru y’imyaka 25 irangiye uyu muryango uvutse. Iyi sabukuru ikaba yarizihijwe mu kwezi k’Ukuboza, mu mwaka ushize wa 2012.
Nyiranzeyimana Espérance, wari uturutse ku rwego rw’akarere ka Nyamasheke yabwiye aba banyamuryango ba FPR bo mu murenge wa Kagano ko bashimirwa ibyiza bakoze mu kwitegura iyi sabukuru yarangiye, ariko kandi aba banyamuryango bakaba bafite inshingano zo gukomeza gukora ibindi bikorwa bigikemewe kugira ngo iterambere n’imibereho myizaq y’abaturage bigerweho ku kigero gikwiriye.
Chairman w’Umuryango wa FPR-Inkotanyi ku rwego rw’umurenge wa Kagano, Mwumvaneza Jean Damascene yatangaje ko abanyamuryango ba FPR bo muri uyu murenge banejejwe no gushimirwa n’Ubunyamabanga bukuru bw’uyu muryango uko bitwaye mu gutegura isabukuru kandi avuga ko impanuro bahawe zo gukomeza guteza imbere ibikorwa byagezweho n’uyu muryango bazazishyira mu bikorwa uko bikwiye.
Abanyamuryango bitabiriye iyi nama ni abagize komite nyobozi y’uyu muryango ku rwego rw’umurenge waKagano, komite ngenzuzi n’iy’imyitwarire, urugaga rw’abagore n’urw’urubyiruko ndetse na komite zateguye isabukuru y’imyaka 25 muri uyu murenge.