Kuri uyu wa 27/03/2013 mu karere ka Kirehe hateraniye inama yo gutegura kwibuka jenoside yakorewe abatusti mu 1994, aho yahuje abayobozi batandukanye harimo absahinzwe uburezi mu mirenge. abashinzwe imibereho myiza y’abaturage, abayobozi b’ibigo nderabuzima hamwe n’abahagarariye abacitse ku icumu ,ingabo na Polisi bakaba bibukijwe gutegura icyunamo uko bigomba.
Muri iyi nama bemeje ko ku rwego rw’akarere icyunamo cyo kwibuka ku nshuro ya 19 Genoside yakorewe abatutsi mu mwaka w’1994 bazabitangiriza mu murenge wa Nyarubuye mu kagari ka Nyabitare, umuyobozi w’akarere wungirije ushinzwe imibereho myiza y’abaturage Murekatete Jacqueline akaba yasabye abitabiriye inama gushyira ingufu mu gukangurira abaturage kwitabira icyunamo bityo bakifatanya n’abacitse ku icumu kwibuka abazize Genoside,akaba yabibukije ko muri iki gihe cy’icyunamo hari ibiganiro byateguwe muri mu rwego rwo gukangurira abaturage gukomeza kwirinda icyo aricyo cyose cyagarura ingengabitekerezo ya jenoside.
Uyu muyobozi w’akarere wungirije ushinzwe imibereho myiza y’abaturage yakomeje akangurira abitabiriye inama ko bakwibutsa abaturage ko icyitwa imyidagaduro cyose kitemewe mu gihe cy’icyunamo bakaba bateganya kuzafasha abacitse ku icumu muri iki gihe cy’icyunamo.
Mu rwego rwo kwibuka abatutsi bazize jenoside bashyinguye mu gihugu cya tanzaniya muri iyi nama bakaba bafashe gahunda yo kuzajya gukora isuku ku rwibutso mu gihugu cya Tanzaniya ahitwa Ngara tariki ya 02/04/2013.
Uru rwibutso ruherereye mu gihugu cya Tanzaniya ahitwa mu mudugudu wa Nyakahanga ,akagari ka Rusumo mu murenge wa Rusumo akarere ka Ngara mu ntara ya Kagera,aha hakaba harashyinguwe abantu bagera kuri 917 barimo abana, abagore n’abagabo bakaba baratoraguye imibiri yabo mu mugezi w’akagera mu gihe cya jenoside ikaba yarakuwemo n’abakozi b’umushinga wa gikirisitu wita ku mpunzi muri Tanganyika Christian refugee service Lutheran world federation Ngara.
Kuri ubu mu karere ka Kirehe bateganya kuzashyingura mu cyubahiro imibiri itatu yabonetse aho bagitegereje n’indi ine bivugwa ko itarimurwa, iyi nama ikaba yitabiriwe n’ingabo na polisi bakorera mu karere ka Kirehe.