Insanganyamatsiko y’uyu mwaka wa 2013, iragira iti “Twibuke jenoside yakorewe abatutsi duharanira kwigira”. Icyumweru cyo kwibuka kiva tariki 7 kugeza tariki 13 Mata 2013, giteganyijwemo ibiganiro 13, bikazatangirwa ku rwego rw’umudugudu.
Mu nama y’abakozi b’umurenge wa Runda yabaye tariki 26/3/2013 bagennye ibikorwa biteganyijwe mu gihe cy’icyunamo n’abazatanga ibiganiro biteganyijwe. Mu biteganyijwe gukorwa, harimo gusura umudugudu w’abacitse ku icumu batishoboye wo mu kagari ka Gihara no kwimura imibiri ishyinguye mu miryango ya bo mu kagari ka Kagina, bakayijyana mu Rwibutso rwo mu Kibuza mu murenge wa Gacurabwenge.
By’umwihariko, Umurenge wa Runda wibuka abawuguyemo tariki 15 Mata, Urwibutso rwa bo rukaba ku ruzi rwa Nyabarongo. Mu nama bashyizeho Komite itegura ikwibuka; igizwe n’abashinzwe umutekano, ubuzima, Ibuka, ushinzwe ihungabana n’umukozi w’umurenge ubifite mu nshingano.
Mu nama, abanyamabanga Nshingwabikorwa b ‘utugari bahawe ibiganiro byo gushyikiriza abazabitanga mu midugudu. Ibyo biganiro 13 bivuga: ku ngamba zo kwigira mu rwego rw’imibereho myiza, urw’imiyoborere, uw’ubutabera n’urw’umutekano w’imbere mu gihugu no hanze ya cyo.
Ibyo biganiro bizibanda kandi ku bimenyetso by’amateka yaranze jenoside yakorewe abatutsi, ku akamaro ko kwibuka, ku kurwanya jenoside n’ingengabitekerezo ya yo, gukumira ihakana n’ipfobya rya Jenoside no ku ihungabana.
Hazaganirwa no ku ruhare rw’umuco mu kwibuka no gufasha igihugu kwigira, uruhare rw’amadini mu kwibuka no gufasha igihugu kwigira, uruhare rw’urubyiruko mu kwibuka no kubaka igihugu kigamije kwigira no ku ruhare rw’abagore mu kwibuka no kubaka igihugu kigamije kwigira.