Abayobozi b’Umuryango wa FPR n’Urugaga rw’abikorera basura stand z’imurikabikorwa. (Photo: N. Leonard)
Abitabiriye imurikabikorwa rya FPR mu Karere ka Gakenke, kuri uyu wa kabiri tariki 04/12/2012, batangaza ko ibikorwa by’iterambere bagezeho babikesha umutekano wazanwe n’umuryango wa FPR Inkotanyi.
Basobanura ko nta kintu barikugeraho iyo baba badafite umutekano usesuye kuko umutekano ari ipfundo ry’iterambere.
Iryo murikabikorwa ryitabiriwe n’amakoperative akora imirimo y’ubuhinzi, abikorera ku giti cyabo batunganya inzoga n’imitobe ndetse n’ibigo by’imari iciriritse.
Abamurikaga ibikorwa by’iterambere byagezweho n’amakoperative y’ubuhinzi bavuga ko ubuyobozi bwa FPR bwateje imbere abahinzi, bubakangurira guhuza ubutaka no gukora ubuhinzi bwa kijyambere.
Bashimangira ko mbere bahingaga ibijumba, amateke n’imyumbati bivangavanze ntibabone umusaruro mwiza none ngo basigaye babona umusaruro uhagije bakanasagurira isoko, bakabasha kwishyura mitiweli no gukemura ibibazo byo murugo.
Umwe mu bikorera witwa Twahirwa Alexis avuga ko FPR yashyize imbaraga mu kongera ubumenyi mu baturage, bihindura imibereho y’abaturage bo hasi. Ku ruhande rwe, asobanura ko byatumye ava mu nzu nto y’ibirere none ageze ku nzu nziza n’imodoka ebyiri, imodoka yo gutemberamo no gukoresha mu mirimo y’ubucuruzi n’ubworozi bw’inkoko.
Abagore bitabiriye imurikabikorwa batangarije Kigali today ko ubuyobozi bwa FPR bwabahaye ijambo, butuma yiga ndetse anatinyuka kwihangira imirimo imufasha kwiteza imbere.
Marithe Mukamutara avuga ko nyuma yo kumva inama z’ubuyobozi bwa FPR zishishikariza abantu cyane cyane abagore kwihangira akazi, yatangiriye ku bihumbi 200 akorera mu nzu y’ubukode maze ashinga resitora ariko ngo amaze kuzuza “hoteli” azakoreramo mu Mujyi wa Gakenke.