Ibiyobyabwenge byangijwe birimo kanyanga
Ibiyobyabwenge byangijwe birimo kanyanga
Ibiyobyabwenge bifite agaciro ka miliyoni hafi eshanu z’amafaranga y’u Rwanda byangiririjwe mu ruhame hanashimwa abamotari ubufatanye bwabo mu kubifata.
Byangijwe kuri uyu wa 24 Gashantare 2016 mu karere ka Ngoma. Mu byangirijwe harimo kanyanga litro 668L, n’urumogi ibiro 171Kg hakiyongeraho ibikoresho byifashishwa mu guteka kanyanga byafatanwe abaziteka.
Police y’igihugu yashimye ubufatanye n’abamotari mu kugaragaza abatwara ibiyobyabwenge,maze abamotari nabo batangaza ko kurwanya ibiyobyabwenge babifitemo inyungu kuko abakoresha ibiyobyabwenge aribo babiba za moto ndetse bakanabica.
Ruremesha Simeon utwara moto Ngoma yagize ati”Turwanya abakoresha ibiyobyabwenge kuko aribo batwiba za moto zacu,bakadutega nijoro twagera munzira bakatwica bakiba moto.Twiyemeje kutabahishira.”
Umuvugizi wa police muntara y’Iburasirazuba,I.P Emmanuel Kayigi,ashima ubufatanye bw’abaturage mu gukumira no gutanga amakuru kuhantu babonanye ibiyobyabwenge.
Byumwihariko uyu muvugizi wa police yashimye uruhare rw’abamotari mu gutangama amakuru bigafatwa ariko anasaba bake bakibitwara cyangwa bagahishira abo batwaye babifite kwikubita agashyi kuko uwabifatanywa byamugiraho ingaruka zikomeye.
Umuyobozi w’akarere ka Ngoma w’agateganyo,Kanayoge Alexis,we yagiriye inama abamotari kwirinda gutwara abafite ibiyobyabwenge kuko igihe bafatwa bahomba na moto zabo zigatezwa cyamunara ndetse bakanafungwa.
Yagize ati” Ukaba watangiye unyonga igari ukazamuka neza ukagera ku kwigurira moto warangiza utwara ibiyobyabwenge bagufata ya moto ukayihomba ndetse ugafungwa imyaka itanu.Murumva bitaba bibabaje?Ndabasa kwirinda ibiyobyabwenge mu kazi kanyu.”
Uyu muyobozi w’akarere yanasabye abaturage muri rusange kwirinda ibiyobyabwenge kuko bidindiza iterambere ndetse n’ubifatiwemo bigatuma asubira inyuma mu iterambere kubera ibihano bikarishye ahabwa.
Mu bikoresho byatwitswe harino n’intwaro gakondo zafatanwe abatekaga kanyanga bashaka kurwanya abaje kubafata. Akarere ka Ngoma kza kumwanya wa gatatu nyuma ya Kirehe na Nyagatare ya mbere mu rwego rw’intara y’Iburasirazuba mu gufatirwamo ibiyobyabwenge byinshi.