Ibi biyobyabwenge byagiye bifatwa mu buryo butandukanye mu gihe cy’amezi atandatu ashize.
Polisi y’Igihugu ifatanyije n’abaturage b’Akarere ka Rwamagana, tariki 29/08/2015, yangije ibiyobyabwenge byafashwe bifite agaciro ka miliyoni 2.5 byiganjemo kanyanga n’urumogi.
Litiro 1092 za kanyanga, ibilo 18 by’urumogi, insheke (ari yo miheha yabugenewe iyungurura kanyanga) 34 ndetse n’amacumu 4 abafatanywe kanyanga birindishaga nk’intwaro, ni byo byangirijwe imbere y’abaturage b’Umurenge wa Kigabiro.
Umuvugizi wa Polisi y’Igihugu mu Ntara y’Iburasirazuba, IP Emmanuel Kayigi, yasabye abaturage kwamagana ikoreshwa ry’ibiyobyabwenge kuko ridindiza iterambere n’imitekerereze ahubwo bakayoboka ibikorwa byabateza imbere binyuze mu nzira nyazo.
Ibyo ngo byabarinda igihombo n’ibihano bikomeye birimo no gufungwa, bigera ku bakoresha ibiyobyabwenge.
IP Kayigi yongeye gusaba abaturage kurushaho gutanga amakuru ku gihe y’ahari ibiyobyabwenge kugira ngo bikurikiranwe binangizwe hakiri kare bitarateza ingorane.
Umuyobozi w’Akarere ka Rwamagana wungirije ushinzwe ubukungu, Mudaheranwa Regis, na we avuga ko ibiyobyabwenge bidindiza iterambere ry’uwabyishoyemo kandi rigateza umutekano muke kuko ngo akenshi ni byo mvano y’ibyaha by’urugomo bigaragara muri aka karere.
Ndagijimana Desiré, umuturage w’Umurenge wa Kigabiro, yemeza ko uwafashe ibiyobyabwenge ata umurongo kandi ntabone n’imbaraga zo gukora. Uyu musore asaba inzego zose gufatanya kugira ngo ibiyobyabwenge bicike.
Amategeko y’u Rwanda ahanisha uwanyoye ibiyobyabwenge igifungo kiva ku mwaka umwe kugeza kuri 3 n’ihazabu y’amafaranga y’u Rwanda ava ku bihumbi 50 kugeza ku bihumbi 500. Ubicuruza ahanishwa igifungo kiva ku myaka 3 kugeza kuri 5 ndetse n’ihazabu iva ku bihumbi 500 kugeza kuri miliyoni 5.