Umuyobozi w’Akarere ka Gatsibo n’abahagarariye Ingabo na Polisi mu Karere
Imirenge ya Kabarore na Kiramuruzi iherereye mu Karere ka Gatsibo, niyo itungwa agatoki n’inzego z’umutekano ko iza ku isonga mu kugaragaramo ibikorwa by’urugomo rukabije hamwe n’ibyaha ndengakamere.
Ibi ni ibyagaragajwe na raporo y’inzego z’umutekano mu Karere ka Gatsibo mu nama y’umutekano idasanzwe yabaye kuri uyu wa 5 Werurwe 2014, iyi nama ikaba yari ihuje inzego z’umutekano mu Karere zirimo Ingabo na Polisi, ubuyobozi bw’Akarere ka Gatsibo, abanyamabanga nshingwabikorwa bose b’imirenge, inzego z’abagore n’izurubyiruko ndetse n’abavuga rikijyana bo muri aka Karere.
Nkuko byagaragajwe, iyi mirenge iza ku isonga mu kugaragaramo urugomo rukabije n’ibyaha ndengakamere bitewe ahanini nuko ariyo mirenge iri mu mijyi, ugasanga ariyo ndiri y’ibiyobyabwenjye n’urugomo.
Twifuje kumenya icyo ubuyobozi bw’umurenge wa Kabarore bubivugaho n’ingamba bafite mu gukumira ibyaha ndengakamere, Umunyamabanga nshingwabikorwa wawo Murara Fred adutangariza ko ubu hafashwe ingamba zo gukaza amarondo, n’abaturage bakarushaho gukorana n’inzego z’umutekano batangira amakuru ku gihe.
Umuyobozi w’Akarere ka Gatsibo Ruboneza Ambroise, yavuze ko iyi nama iba igamije kurebera hamwe uko umutekano umeze mu Karere, ndetse n’ingamba zafatwa mu kurushaho kuwubungabunga.
Yagize ati:”Umutekano niwo musingi w’inbintu byose haba mu mibereho myiza, mu bukungu n’iterambere ry’Akarere muri rusanjye, bityo rero tutawusigasiye ntacyo twaba dukora”.
Iyi nama yashojwe hafashwe ingamba zirimo ko; abayobozi mu nzego z’ibanze bagomba kumenya abantu bose bakekwaho kuba intandaro y’urugomo mu Mirenge no Mutugali bayobora, gukaza amarondo, kurushaho gukorana na gahunda y’ijisho ry’umuturanyi no gukomeza gushishikariza abaturage gutanga amakuru ku gihe.