Guverineri w’Intara y’Amajyaruguru BOSENIBAMWE Aime
Mu ngendo amazemo iminsi zo gusura uturere tugize intara y’amajyaruguru Guverineri Bosenibamwe yasabye abakozi b’akarere ka Gicumbi gukoresha uko bashoboye bakazesa imihigo y’akarere 100%.
Kuri uyu wa 18/4/2013 Guverineri BOSENIBAMWE Aime yagiriye inama n’abakozi b’akarere ndetse n’izindi nzego zitandukanye zikorera mu karere ka Gicumbi mu rwego rwo kureba aho ishyirwa mu bikorwa ry’imihigo y’akarere umwaka wa 2012-2013 igeze.
Nk’uko byagaragajwe n’umukozi w’akarere ushinzwe gukurikirana ibyijyanye n’imihigo HABIYAKARE Appolinaire, yatangaje ko akarere mu mihigo gafite igera kuri 61 aho mubijyanye n’ubukungu m’ibikorwa by’iterambere iyagezweho n’imihigo 39, ku bijyanye n’imibereho myiza y’abaturage akarere kageze ku mihigo 12 n’aho ku bijyanye n’imiyoborere myiza n’ubutabera akarere kakaba gafite imihigo karageze ku mihigo10.
Ushinzwe gukurikirana ibyijyanye n’imihigo HABIYAKARE Appolinaire
Ibi babisuzumye mu gihe hasigaye amezi abiri kugirango imihigo y’umwaka ikorerwe isuzuma.
Guverineri BOSENIBAMWE yasanze akarere ka Gicumbi kamaze gushyira mu bikorwa ibyo kahize ku kigero cya 78,8% bingana n’imihigo 48, indi mihigo ikaba itari yagerwaho ku buryo bushimishije nk’uko babigaragarije na HABIYAKARE Appolinaire.
Guverineri w’Intara y’Amajyaruguru Bwana BOSENIBAMWE Aime nyuma yo kugaragarizwa imihigo aho igeze ishyirwa mu bikorwa akaba yasabye buri mukozi urebwa n’umuhigo gukora uko ashoboye kose umuhigo we ugashyirwa mu bikorwa ku buryo nta numwe uzasigara utageze ku 100%.
Ku mihigo yagaragajwe yasigaye inyuma akarere kagombaga gufashwa n’izindi nzego Guverineri akaba yabemereye kubakorera ubuvugizi kugirango nayo ikorwe mu gihe cya vuba.
Yabibukije ko imihigo ari amarushanwa bariho n’utundi turere bityo bakaba bagomba kutaba abanyuma kuko umwaka ushize akarere katashoboye kugaragara mu myanya ishimishije ku rwego rw’igihugu aho kagize umwanya wa 25.
Umuyobozi w’akarere ka Gicumbi Mvuyekure Alexandre akaba yavuze ko iminsi isigaye ahanini igiye guharirwa gukurikirana ishyirwa mu bikorwa ry’imihigo isigaye kugirango nayo ishyirwe mu bikorwa ndetse ashishikariza n’abakozi gukomeza kugira imihigo iyabo no guharanira ishema ry’akarere mu tundi turere.
Abakozi nabo bafite imihigo itarashyirwa mu bikorwa bemeye ko bagiye gushyira imbara mu kuyihigura bakazaza kumwanya ushimishije.