Muri bimwe mu bibazo byakunze kugarukwaho n’abacitse ku icumu rya Jenoside mu karere ka Nyabihu mu ijoro ryo kwibuka kuri uyu wa 12 Mata 2015, ni imibiri y’abazize Jenoside yakorewe Abatutsi kugeza n’ubu itaraboneka ngo ishyingurwe mu cyubahiro,Kikaba ari kimwe mu bibazo bibabereye imbogamizi.
Juru Anastase uhagarariye IBUKA mu karere ka Nyabihu,yasabye abaturage batandukanye batuye aka karere gufasha abacitse ku icumu rya Jenoside n’ubuyobozi,kubona imibiri y’abazize Jenoside yakorewe Abatutsi itaraboneka ngo ishyingurwe mu cyubahiro.
Ni mu gihe kuri uyu wa 13 Mata,hitegurwa gushyingurwa mu cyubahiro,imibiri 21 y’abazize Jenoside yakorewe Abatutsi yabonetse mu mirenge itandukanye y’akarere ka Nyabihu.
Juru yagize ati“Ni ugushyingura abacu mu cyubahiro kandi ni ugusubiza abacu icyubahiro batabonye”.Yongeraho ko hari imibiri myinshi isaga 1000 itaraboneka ngo ishyingurwe mu cyubahiro.
Akomeza avuga ko bibabaje kubona bamwe mu baturage bakuze badatanga amakuru ngo habe hamenyekana aho imibiri yajugunywe,nyamara ugasanga abana bato bo baranga aho imibiri iri kandi bakayibona.
Ati“niba abana aribo batanga amakuru kurusha abakuru babizi,sinzi indwara twaba turwaye”. Gusa avuga ko atari bose badatanga amakuru,ariko abatayatanga bayazi yabasabye kwisubiraho.
Yakomeje asaba abaturage bumva ko ari abakirisitu kuvugisha ukuri kugira ngo amakuru y’ahajugunywe imibiri y’abazize Jenoside amenyekane. Yongeraho ko bibabaje kubona hari aho bajya bakura nk’imibiri nk’ukuboko cyangwa ukuguru gusa,nyamara kandi ugasanga hari mu mirima ihingwa n’abaturage,batatanze amakuru.
Nsengiyumva Athanase,uvuga ko bitera intimba ikomeye kutabona imibiri y’abawe bazize Jenoside ngo uyishyingurwe mu cyubahiro.Avuga ko iyo utabonye uwawe ngo umushyingure,uhora wumva ko atapfuye,ugahora wizeye kumubona,bikaba byaguhungabanya.
Umuyobozi w’akarere ka Nyabihu Twahirwa Abdoulatif, nawe yasabye abaturage kurangwa n’umutima wa kimuntu bakaranga aho imibiri y’abazize Jenoside yaba yarajugunywe.
Mu rwibutso rwa Mukamira,hakaba hashyinguwe mu cyubahiro imibiri 2053,iziyongeraho indi mibiri 21 ishyingurwa mu cyubahiro kuri uyu wa 13 Mata 2015